之前講過，廣東有三寶：「老薑、陳皮、禾稈草」，史友們可能會話「乜禾稈草值錢嘅咩？」「廣東大把嘢有價值過佢啦！」等等。能夠貴為廣東三寶之一，自然有佢獨特之處。
禾稈草係指禾本科農作物成熟後剩餘嘅莖葉部分，其實係農耕嘅副產品。至於禾稈草之所以被當係寶，唔係因為佢本身價值，而係佢功能性高兼用途廣泛。例如禾稈草可以用嚟紮嘢，曬乾之後又可以攞嚟作燃料，燒完仲可以用嚟當肥料，另外，禾稈草又可以製作成掃把，鋪上張床又可以當床褥保暖，仲可以做成稻草人驅趕雀鳥。所以，响以前嘅嶺南一帶，禾稈草絕對係生活其中一種必需品，被譽為廣東三寶之一實不為過。